Naugdaw ang pipila ka mga edipisyo ug panimalay sa nagkalain-laing sunog nga mitumaw sa dakbayan sa Lapu-Lapu kagahapong adlawa.
Ang unang insidente nahitabo alas 5:19 sa buntag sa Sitio Marbeach, Barangay Marigondon. Ang sunog naglambigit sa usa ka residential property nga gipanag-iya ni Aireen Dales. Giisa ang unang alarma alas 5:20 sa buntag.
Dali usab nga miresponde ang mga sakop gikan sa Marigondon Fire Station Shift B ug ang Lapu-Lapu City Fire District Region 7, Usa ka estruktura ang hingpit nga nasunog, wala hinouy gitaho nga nasamdan o namatay.
Samtang, mitumaw usab ang ikaduhang sunog sa Z.Rizal Street sa Barangay Población pasado alas 7:00 sa buntag, nga nagsugod sa luna ni Melvin Alfeche ug nahimutang sa ibabaw sa usa ka botika.
Matud ni FSupt. Arnel S. Abella, nga posibleng may kalabutan sa electrical wiring ang hinungdan sa sunog nga niulbo sa ikaduhang andana sa usa ka building haduol sa Lapu-Lapu city Public Market sa brgy. Población.
Nagsilbing stock room ang 2nd floor sa maong building sa pharmacy nga nahimutang sa ground floor niini. Wala hinooy gikatahong na-angol o nakalas atol sa hitabo. Apan naka-apekto kini sa usa ka bakery ug sa pharmacy nga parehong nahimutang sa ground floor.
Sa pikas bahin, moabot sa 30 ka panimalay ang naugdaw sa sunog sa Zone 1 Barangay Buaya sa siyudad sa Lapu-Lapu alas 10:00 pasado sa susamang adlaw ug gibana-banang moabot sa sobra P1M milyones ang danyos.
Wala ra usab natala nga nakalas og naangol sa maong sunog.
