Namatay ang tulo ka tawo human sa gidudahang pag-ulbo sa Hantavirus sakay sa usa ka cruise ship sa Atlantic Ocean, sumala sa World Health Organization (WHO).
Gikumpirma sa WHO nga usa pa lamang ka kaso ang napamatud-an, samtang lima pa ang padayon nga giimbestigahan. Usa usab ka 69-anyos nga British national ang anaa karon sa intensive care sa Johannesburg, South Africa.
Ang outbreak gitaho sakay sa MV Hondius, nga gidumala sa Oceanwide Expeditions, nga naglawig gikan sa Argentina paingon sa Cape Verde.
Sumala sa mga awtoridad sa South Africa, ang unang pasyente—usa ka 70-anyos nga lalaki—namatay samtang sakay sa barko, ug ang iyang lawas anaa karon sa Saint Helena.
Ang iyang 69-anyos nga asawa, nga gi-evacuate ngadto sa Johannesburg, namatay usab didto. Ang magtiayon giila nga mga Dutch national.
Usa pa ka ikatulong biktima ang namatay samtang nagpabilin sa barko, samtang nagpadayon ang koordinasyon aron ma-isolate ug matambalan ang ubang mga pasyente sa Cape Verde.
Ang WHO nagpadayon sa pagtabang sa koordinasyon tali sa mga nasud nga nalambigit ug sa operator sa barko, lakip ang medikal nga pagbakwit sa mga pasyente ug pag-assess sa posibleng risgo sa panglawas sa publiko.
