CEBU CITY-Gipaabot nga 3 mil ka mga pari ang mosalmot sa National Retreat for Priests 2023 nga ipahigayon sa IEC Convention Center sa Barangay Luz, Siyudad sa Sugbo sa Nobiyembre 7 hangtud sa 9.
Kini ang gibutyag sa Overall Chairperson sa NRP 2023 Working Committee, nga si Fe Barino, nga kapin na sa 1,000 ka mga pari gikan sa 22 ka Archdioceses ug Dioceses sa nasud ang pasiunang nakaparehestro na.
Hinungdan nga gilauman nga moabot og 3 mil ka mga pari ang mosalmot sa NRP 2023 nga maoy labing unang dako ug nasudnong kalihokan sa Simbahang Katoliko sukad niigo ang pandemic sa COVID 19.
Sa pikas bahin gidapit ni Cebu Archbishop Jose Palma ug ang Catholic Bishops Conference of the Philippines (CBCP) Episcopal Commission on Clergy ang mga pari sa pagsalmot sa NRP 2023 arun pagpalig-on sa ilang kaugalingon ug sa relasyon sa Labaw’ng Makagagahom.
Nasayran nga ang main speaker sa kalihokan mao si Sister Bridge MCKenna nga usa ka Irish Nun nga naila sa tibuok kalibutan sa iyang ” gift of healing ” ug sa iyang pagtabang sa kaparian.
Siya usab ang author sa sikat nga libro nga ” Miracles Do Happen”, Ang Tema sa NRP 2023 mao ang ” Priesthood: A call to Holiness “.
