CENTRAL VISAYAS- Gibutang sa heightened alert ang Police Regional Office 7 aron masiguro ang kahapsay ug seguridad sa Central Visayas sa umaabot nga Semana Santa 2026.
Gipahigayon kini pinaagi sa usa ka coordinating conference nga gipangunahan ni PBGen Redrico A. Maranan kauban ang Command Group, Regional Staff, ug mga Provincial ug City Directors sa rehiyon.
Ang meeting gihimo sa Camp Sergio Osmeña Sr., Cebu City aron repasohon ug susihon ang kasamtangang security template sa PRO-7 ug masiguro nga andam ang tanang operational plans alang sa gilauman nga pagdagsa sa mga biyahero ug deboto.
Gisusi usab ang kahimtang sa mga lugar nga sagad bisitahan sa katawhan, sama sa mga simbahan, transport terminals, tourist destinations, ug dagkong dalan.
Gipasabot ni PBGen Maranan ang kamahinungdanon sa lig-on nga koordinasyon ug heightened operational readiness sa mga field commanders aron masiguro ang epektibong implementasyon sa seguridad.
Matod sa PRO-7, adunay na inisyal nga deployment sa kapulisan sa strategic areas, samtang dugang personnel ang ipakatap sa sunod nga mga adlaw tungod sa gilauman nga pagtaas sa lihok sa publiko ug relihiyosong kalihokan.
Gipasalig ni Maranan sa publiko nga andam ang kapulisan sa pagpanalipod sa komunidad ug pagmintinar sa malinawon, luwas, ug organisadong pag-obserbar sa Semana Santa.
Gihangyo usab sa kapulisan ang publiko nga magpabiling alerto ug makigtambayayong sa mga otoridad aron masiguro ang hapsay ug malinawon nga selebrasyon.
Nagpadayon usab ang PRO-7 sa pakigkoordinar sa mga lokal nga panggamhanan, emergency response agencies, ug uban pang stakeholders alang sa lunsay ug orderly nga selebrasyon sa Semana Santa 2026.
