CENTRAL VISAYAS- Gipahibalo sa Police Regional Office 7 (PRO7) ang temporaryong suspensyon sa Permits to Carry Firearms Outside of Residence (PTCFOR) ug ang pagpatuman sa total gun ban sa pipila ka lugar isip kabahin sa gipahugot nga seguridad alang sa ASEAN Leaders’ Summit 2026.
Matud sa PRO7, ipatuman ang maong lakang sugod 12:01 AM sa Mayo 4, 2026 hangtod 11:59 PM sa Mayo 11, 2026, nga mokupot sa Cebu City, Mandaue City, Lapu-Lapu City, ug sa tibuok lalawigan sa Cebu.
Ang suspensyon naglakip sa tanang permits sa pagdala ug pagbiyahe sa armas, lakip ang mga miyembro sa gun club, gun dealers, manufacturers, ug repair services. Apil usab ang permits sa explosive transport, ingon man ang temporaryong pagsira sa firing ranges ug suspensyon sa operasyon sa mga firecracker ug pyrotechnic manufacturers.
Giingon sa PRO7 nga sa maong panahon, ang mga miyembro lamang sa Philippine National Police, Armed Forces of the Philippines, ug ubang law enforcement agencies nga naka-duty ug naka-uniporme ang tugotan sa pagdala og armas.
Matud ni PBGen Arnold E. Abad, Acting Regional Director sa PRO7, kabahin kini sa gipahugot nga security operations ubos sa Enhanced Managing Police Operations, sa koordinasyon sa AFP, mga LGU, ug ubang security stakeholders.
Giingon niya nga ang maong lakang nagpakita sa ilang commitment sa paghatag og episyente, matinud-anon, ug responsive nga serbisyo publiko, ilabina sa pagseguro sa kalinaw ug kahapsay sa ASEAN Summit.
Gidasig usab sa PRO7 ang publiko nga magpabiling alerto ug i-report dayon ang bisan unsang kadudahang kalihukan ngadto sa mga otoridad isip suporta sa seguridad sa Central Visayas.
