PROVINCE OF CEBU- Nasikop ang tulo ka tawo atol sa buy-bust operation nga gipahigayon sa PDEA Cebu Provincial Office ug Borbon Police sa Sitio Tambis, Barangay Lugo, Borbon—usa ka barangay nga gi-deklarar nang drug-cleared, niadtong Agosto 6, 2025.
Gidakop ang drug den maintainer nga si alyas Joey, 42, ug duha ka bisita nga sila si alyas Nestor, 52, ug Ian, 21.
Nasakmit ang 17.12 gramos nga gituohang shabu nga nagkantidad og ₱116,416, buy-bust money, cellphone, ug drug paraphernalia.
Sumala ni PDEA-7 Regional Director Joel B. Plaza, resulta kini sa tulo ka semana nga surveillance base sa tip gikan sa concerned citizen.
Nasuta nga kada semana, si Joey modispose og 15–20 gramos nga droga bisan pa sa drug-cleared status sa barangay.
Ang mga ebidensya gi-turnover na sa PDEA-7 Regional Laboratory. Ilawom sa RA 9165, ang pagmintinar og drug den silotan og tibuok kinabuhi nga pagkabilanggo ug dako nga multa.
Gihangyo sa PDEA ang publiko nga magpabiling mabinantayon ug motaho dayon og kadudahang kalihokan.
