PROVINCE OF BOHOL- Hugot ang monitoring ug disaster response sa Kagamhanang Lalawigan sa Sugbo human miigo ang 5.1 magnitude nga linog nga miigo niadtong Lunes, Abril 6 nga nanukad gikan sa amihanang probinsya.
Asoy pa pinaagi sa eksklusibong pakighinabi sa Bombo Radyo Cebu News Team kang Aldwin Empaces, ang Assistant Provincial Administrator sa Kapitolyo sa Sugbo nga adunay mando si Cebu Gov. Pamela Baricuatro sa pag-monitor ug pakigkoordinar sa mga local government units (LGUs) sa mga kadaot sa linog ilabi na sa mga imprastruktura.
Gitutokan nila ang kahimtang sa Cebu Provincial Hospital sa dakbayan sa Bogo aron susihon kung luwas ba nga gamiton ang pasilidad ilabi na nga mga pasyente kini sa mga makalilisang nga mga sakit.
Tinguha sa Kapitolyo sa Sugbo nga magtukod sila og temporary tents sa tambalanan sa Bogo tungod kay ang mga pasyente kay adunay kahadlok kung sa higayon nga adunay kusog-kusog nga aftershock nga muuyog pag-usab nga nakapadugang sa ilang trauma sa katalagman.
Sa pagkakaron, padayon ang aksyon sa Kapitolyo sa Sugbo aron sa kinatibuk-an nga masuta ang mga kadaot ug uban pang epekto sa linog nga nakapakurat sa kadagahanan kagahapong adlawa.
