CEBU CITY – Giimbestigaran sa mga sakop sa Police Regional Office (PRO)-7 ang kamatayon sa 3, lakip na ang barangay kapitan, human sa nahitabong shootout sa Brgy. Lawaan 3, sa dakbayan sa Talisay.
Base sa imbestigasyon sa kapulisan, naglalis ang suspek nga si Dean Torefranca, usa ka kanhi sakop sa US Marines, ug Jed Ybañez mahitungod sa family property nga gipanag-iya sa inahan niini nga si Delia Ybañez.
Mibisita ang kasamtangang kapitan sa Lawaan 3 nga si Jimmy Bartili aron husayon ang maong isyu apan misangput kini sa pagpinusilay.
“Dead on the spot” silang Jed Ybañez ug Kapitan Bartili human sila gipusil ni Torefranca sulod sa ilang panimalay.
Nagtagu dayon si Torefranca sa dihang miresponde dayon ang mga sakop sa kapulisan. Hinungdan nga gisunog sa kanhi US Marine officer ang ilang panimalay sa dihang nagpinusilay sila sa mga otoridad.
Pagkalabay sa usa ka oras nga pagpinusilay, napalgan na lang sa mga pulis ang patayng lawas ni Torefranca sulod sa second floor sa ilang panimalay.
Nagkanayon si PRO-7 Director Brig. Gen. Debold Sinas nga ila pang gisuta kung namatay ba si Torefranca sa pagpinusilay o na-suffocate sa sunog.
Dugang pa ni Sinas nga ila pang sutaon ang background ni Torefranca isip kanhi-US Marine officer.
