Naka-import ang Pilipinas og 329,505 ka bariles o 44,119 metriko tonelada nga krudo.
Sumala sa Subic Bay Metropolitan Authority (SBMA), nadawat kini sa Philippine National Oil Company (PNOC) sa Port of Subic Bay pinaagi sa Philippine Coastal Storage and Pipeline Corporation (PCSPC).
Kini gilauman nga makadugang sa suplay sa gasolina sa Pilipinas nga karon 52.02 ka adlaw na lang nga suplay ang gibana-banang nahabilin.
Sumala sa SBMA, ang Bureau of Internal Revenue (BIR) nag-isyu og espesyal nga permit sa PNOC Exploration Corporation (PNOC-EC) aron mapadali ang emergency importation sa mga produktong petrolyo.
Uban sa maong permit, ang standard nga mga proseso sa burukrasya ug mga pamaagi sa customs malaktawan nga mahimong makapalangan pa sa pag-abot sa produktong paliton.
Ang PNOC-EC mopalit usab og duha ka milyon nga bariles sa lana ug 22,000 metriko tonelada nga liquefied petroleum gas (LPG).
“These emergency stocks that are expected to augment around 10 days of the country’s additional fuel supply and strengthen LPG reserves, are being secured in response to Middle East market disruptions,” sumala sa SBMA.
