Gikonsiderar ni Akbayan Party-list Representative Percival Cendaña nga minor issue lamang ang sayong pag-recess sa impeachment hearing ni Vice President Sara Duterte gahapon Huwebes, tungod kay nagpadayon gihapon ang pagpresentar sa mga testimonya ug ebidensiya nga may kalabotan sa impeachment complaint.
Matud ni Cendaña, bisan adunay mga kalisdanan sa dagan sa hearing, nagpabiling lig-on ang mga testimonya sa mga saksi nga gitumong sa pagpalig-on sa mga basehan sa impeachment.
Gihatagan niya og pagtagad ang testimonya sa saksi gikan sa Bureau of Internal Revenue (BIR) kalabot sa kawad-on sa rekord sa eCAR o electronic Certificate Authorizing Registration, nga may kalabotan sa pagbalhin sa mga shares sa Cali-88 Foods Corporation.
Matod pa niya, ang maong isyu nagpatungha og mga pangutana bahin sa koneksiyon ug posibleng interes sa mag-asawang Manases Carpio ug Bise Presidente Sara Duterte sa maong korporasyon.
Gipasabot ni Cendaña nga importante nga masuta ang mga rekord ug transaksiyon aron matino kung adunay mga interes o pagpanag-iya nga wala maapil sa ilang mga deklarasyon sa kabtangan, ingon man ang ubang pinansyal nga transaksiyon nga nalambigit sa maong kaso.
Gihisgotan usab niya ang mga alegasyon bahin sa pagdawat og kuwarta gikan sa gobyerno sa China, apan kinahanglan nga ang maong mga pahayag suportahan sa mga ebidensiya ug tukmang mapamatud-an atol sa proseso sa impeachment.
Bisan pa sa sayong pag-recess sa hearing, gipasiugda ni Cendaña nga ang pag-uswag sa impeachment proceedings magdepende sa mga testimonya, dokumento ug uban pang ebidensiyang ipresentar ug susihon sa Senado.
