Nabalaka si Akbayan Partylist Representative Percival Cendaña kalabot sa giingong paghatag og pabor o favoritism sa pipila ka mga kumpanya nga may kalambigitan sa pamilyang Duterte sa Davao City.
Atol sa pakighinabi sa Bombo Radyo Cebu kang Cendaña, nakita sa mga nahitabong imbestigasyon ug sa pamahayag sa saksi nga si Mayor Baste kon unsa ka grabe ang sitwasyon sa syudad, diin ang pipila ka mga kontrata sa gobyerno ug Negosyo sama na lamang sa isyu sa GenCorp napakita nga paborable o adunay mga shares ang pamilyang Duterte.
Dugang pa niya, bisan pa man sa mga paglimod, ang publiko nakasabot ug nakakita sa kamatuoran basi sa mga ebidensya ug testimonya nga gipresentar sa prosekusyon.
Gihatagan usab niya og pagtagad nga ang maong mga kumpanya nagpadayon sa pagpangasikaso ug pagkakita gikan sa mga proyekto ug kontrata nga gidudahan sa kadaghanan.
Samtang, gihimug-atan usab ni Rep. Cendaña nga responsibilidad sa mga local chief executives, ang pagkahibalo ug pagseguro nga hapsay ug sakto ang pagpatuman sa mga lagda sulod sa ilang munisipyo o syudad.
Sumala pa ni Cendaña, ang mga tawo nagbotar sa mga opisyal aron buhaton ang ilang trabaho, ug lakip niini ang pagkahibalo kon unsa ang mga gipang-atubang ug nahitabo sulod sa ilang sakop nga opisina ug syudad.
Gidugang pa nga dili pwedeng ipangatarungan nga “walay nahibaloan” o “walay kalambigitan” ang usa ka local chief executive, inay ang gipahayag ni Davao City Mayor Baste Duterte sa iyang pag-atubang sa Sandiganbayan Court, nagpakita gihapon sa “tatak Duterte” nga pagdumala.
