CEBU CITY- Giawhag ni Akbayan Party-list Representative Percival Cendaña ang publiko nga padayong subaybayan ang impeachment trial batok kang Vice President Sara Duterte ug siguruhon nga ang mga senador magdesisyon base sa ebidensiya, dili sa politikal nga interes.
Sa eksklusibong pakighinabi sa Bombo Radyo Cebu, gisuportahan ni Cendaña ang lakang sa prosecution panel nga i-withdraw ang tulo sa upat ka Articles of Impeachment ug ipadayon ang Article II, nga naglakip sa mga alegasyon kalabot sa unexplained wealth, SALN, ug gidudahang gidili nga mga interes sa negosyo.
Matod niya, importante nga mapadayon ang proseso sa impeachment ug masiguro ang pagpanubag sa mga opisyal sa gobyerno ngadto sa katawhan.
Samtang sa pikas bahin, gikuwestiyon usab ni Akbayan Party-list Representative Percival Cendaña ang pipila ka alokasyon sa 2027 national budget, ilabi na ang mga pondo alang sa imprastraktura ug mga programa sa gobyerno.
Lakip sa iyang gikuwestiyon ang P218.7 bilyon alang sa mga dalan ug capital outlay, ingon man ang P27.26 bilyon alang sa mga programa nga, sumala kaniya, nagkinahanglan og mas klarong sukdanan sa pagkaepektibo ug pagpakunhod sa korapsyon.
Gipasiugda usab ni Cendaña ang panginahanglan sa komprehensibong flood management plan, ilabi na sa pagdumala sa mga suba ug river basins, aron masiguro nga ang pondo magamit sa mga proyektong motubag sa tinuod nga panginahanglan sa mga komunidad.
Giawhag niya ang publiko nga aktibong mosubay sa mga deliberasyon sa 2027 national budget ug maningil og tulubagon gikan sa mga opisyal sa gobyerno.
