Gipasalig sa Malacañang nga hugot nga bantayan ni President Ferdinand Marcos Jr. ang gisugyot nga ₱7.2-trilyong national budget alang sa 2027 aron mapugngan ang posibleng pag-abuso ug korapsyon sa paggamit sa pondo sa gobyerno.
Matod sa Palasyo, magtinabangay ang Presidente ug ang Department of Budget and Management (DBM) sa pagmonitor sa paggasto sa pondo aron masiguro nga mapahimuslan kini sa katawhang Pilipino.
Gilauman usab nga susihon pag-ayo sa mga magbabalaod ang mga sugyot nga pag-usab sa badyet atol sa deliberasyon sa bicameral conference committee.
Gipatuman usab sa DBM ang mekanismong gitawag og “for later release,” diin temporaryong dili ipagawas ang pipila ka pondo hangtod mapamatud-an ang balido ug igo nga basihan alang sa usa ka proyekto.
Samtang, wala pa maghatag og tino nga tubag ang Malacañang kung ikonsiderar ba sa Presidente ang paggamit sa ‘reenacted budget’, o ang badyet sa miaging tuig, kon adunay madiskobrehan nga mga iregularidad sa gisugyot nga badyet.
Matod sa Palasyo, sayo pa aron hisgotan ang maong posibilidad.
