Gipasalig sa legal team ni Bise Presidente Sara Duterte nga aduna silay kaugalingong habig ug asoy nga ipresentar kalabot sa mga alegasyon sa dili masaysay nga bahandi sa higayon nga moabot na ang ilang higayon sa pagsumiter og ebidensya atol sa impeachment trial.
Matod pa sa tigpamaba sa depensa nga si Atty. Michael Poa, angay hinumdoman sa publiko nga ang mga hisgutanan karon ug migawas gikan sa mga hearing gibase lamang sa habig sa prosekusyon.
Nagdumili usab si Poa sa paghatag og dugang detalye bahin sa mga isyu sa credit lines, mga transaksyon sa credit card, ug mga giingong transaksyon sa gawas sa nasud, tungod sa lagda nga sub judice nga nagdili sa publikong paghisgot sa mga detalye o merito sa kaso.
Gipasabot niya nga dili usab patas alang sa prosekusyon kung ibutyag sa depensa ang ilang mga argumento ug ang mga detalye sa ilang habig sa dili pa kini opisyal nga ipresentar ngadto sa impeachment court.
Bisan tuod giangkon ni Poa nga anaa sa disbentaha ang kampo sa Bise Presidente samtang nagpaabot sa ilang turno sa pagpresentar og ebidensya ilabi na sa usa ka proseso nga puno sa politika nagpabilin silang masaligon nga mapanghimakak nila ang mga alegasyon nga gipasaka batok kaniya.
