Gidayeg ni Akbayan Partylist Representative Percival Cendaña ang lakang ug aksyon sa Senado nga nagpakita ug nagpatuman sa tinuod nga kahulugan ug “diwa sa tulubagon” alang sa nasud.
Atol sa pakighinabi sa Bombo Radyo Cebu Newsteam kang Rep. Cendaña, gipaambit niini nga dako og papel ang Senado sa pagpanalipod ug pagpatuman sa probisyon sa Konstitusyon nga naghatag og mekanismo aron ang katawhan makapangayo og tulubagon gikan sa mga labing taas nga opisyal sa gobyerno.
Gipasiugda sa magbabalaod nga adunay mga senador nga misunod niini ug naningkamot nga matuman ang ilang mga obligasyon sa matinud-anon nga paagi.
Gipasabot usab niya nga adunay nagkadako nga kabalaka sa katilingban nga basin tungod lang sa pagkalangan o pagpasagad, makalikay ang mga nalambigit ug dili matubag ang mga isyu sa pagpatuman sa balaod ug tulubagon, ilabi na bahin sa mga isyu nga naglambigit sa Bise Presidente.
Busa, usa kini ka butang nga daling masabtan tungod kay nahiuyon sa diwa sa Konstitusyon nga tulubagon ang mga kurakot nga opisyal, ingon man nga padayong nagpakita ang Senado sa gahom nga anaa sa katawhan nga sila adunay katungod sa pagpangutana ug pagsaway sa mga anaa sa labing taas nga katungdanan.
