Labing menos 33 ka tawo ang namatay ug 36 ang naangol human nagpahigayon og airstrike ang militar sa Myanmar duol sa usa ka merkado sa Kyauktaw, Rakhine State, niadtong Lunes, Septiyembre 28.
Sumala sa pahayag gikan sa Arakan Army, usa ka fighter jet ang naghulog og duha ka bomba duol sa mercado, lakip sa mga biktima ang mga tindera, mga namalitay, ug mga residente sa duol.
Gikumpirma ni Wai Hun Aung, usa ka opisyal sa rescue, ang gidaghanon sa mga biktima ug iyang gipunting nga ang maong lugar usa ka dakong wholesale center nga kanunayng adtoan sa mga negosyante gikan sa nagkalain-laing bahin sa rehiyon.
Nagpasidaan ang Arakan Army nga mahimong mosaka pa ang gidaghanon sa mga namatay samtang nagpadayon ang mga operasyon sa pagkuha sa mga biktima ug pagluwas sa nahugno nga merkado.
