Nakabsan sa kinabuhi ang 4-anyos nga batang babaye samtang naangol usab ang 7-anyos niini nga uyoan human mapaso ang tibuok lawas atol sa pagka sunog sa ilang panimalay sa Purok Lubi, Sitiyo Caolong, Barangay Campo 4, bukirang dapit sa siyudad sa Talisay alas 4:49 sa hapon, Sabado, Hulyo 25, 2026.
Giila ang biktima nga si Adierey Borlasa, nga naka angkon og mga paso sa nawong ug sa tibuok lawas niini.
Samtang ang iyang uyoan nga naangol mao si Timothy Borlasa, nga naka angkon og paso sa tuong kamot nga naa sa tambalanan.
Unang nadawat sa kabomberohan sa siyudad sa Talisay ang sunog alas 4:49 sa hapon ug sulod sa 12 minutos hingpit kini nga napawong.
Gikataho nga nag sugod ang kalayu sa usa ka dos andanas nga balay nga gipanag-iya ni Teofilo Borlasa.
Base sa imbestigasyon sa Talisay Fire Station nasayran nga ang duha ka mga bata naa sa sulod sa kwarto atol sa pag ulbo sa kayo, giingung natulog ang 4-anyos samtang ang uyoan nga 7-anyos nag duwa matod pa og cellphone.
Nabantayan nalang sa 7-anyos nga dako na ang kalayo hinungdan nga miambak siya sa bintana nga nabiyaan ang 4-anyos nga batang babaye.
Gisuwayan pa sa pagkuha sa ikaduhang andana sa Inahan nga anaa sa ubos nga bahin aron kuhaon ang bata apan kini makaabli sa pultahan kay giingung naka lock, hinungdan nga miagi siya sa bintana ug sa ilang pagsulod naka angkon na ug paso sa tibuok lawas ang biktima.
Daling gidala sa tambalanan ang biktima apan nabawian gyud kini sa iyang kinabuhi.
Padayon ang gihimong imbestigasyon sa kabomberohan sa dakbayan sa Talisay kung unsay hinungdan sa sunog apan usa sa ilang gitan-aw ang giingung pag overheat sa usa ka electric fan.
