CEBU CITY – Ipaubos sa imbestigasyon ang 40 ka mga pulis nga sakop sa Police Regional Office (PRO) 7.
Gibutyag ni Sr/Supt Jose Carumba, ang head sa Regional Internal Affairs Service (RIAS) nga mag-atubang sa imbestigasyon ang mga nahisgutang pulis gumikan sa ilahang unexplained wealth.
Matud pa ni Carumba nga tulo ka ahensya ang gitahasan nga mag-monitor sa mga pulis nga anaa sa listahan nga imbestigaran.
Ang Regional Intelligence Division (RID) ang mag-monitor sa mga properties samtang ang Regional Intelligence Unit (RIU) ug PDEA usab ang mag-monitor kung adunay kalambigitan sa iligal nga drogas ang mga naasoy nga pulis.
Sa pagkakarun, gipaabot na lang sa RIAS ang beripikasyon sa mga intelligence units arun nga masuta kung aduna gayu’y kalambigitan ang mga nahisgutang pulis sa iligal nga aktibidad nga adunay dakong kontribusyon sa ilahang dili mapasabot nga kabtangan.
Samtang gisiguro usab ni Carumba nga mahatagan og due process ang mga pulis nga ipaubos sa background investigation.
Kahinumdoman nga una nang mihatag og listahan ang Campo Crame sa ngalan sa 51 ka mga pulis nga karun gipaubos na sa imbestigasyon.
