LAPU-LAPU CITY, CEBU-Nakadawat na sa ilang separation pay ang kapin sa 4,000 ka mga trabahante sa Mactan Export Processing Zone (MEPZ) sa dakbayan sa Lapu-Lapu niadtong Martes, Hulyo 25.
Kini ang gikompirmar ni Kim Francisco, pangulo sa Public Employment Service Office (PESO) sa dakbayan sa Lapu-Lapu, gibutyag niini nga ang pagbayad sa separation pay sa mga trabahante sa MEPZ gidumala usab sa Department of Labor and Employment (DOLE).
Ang mga mamumuo nataktak human ang duha ka kompanya nga nagtrabaho sa industriya sa sapot, nagsira sa ilang mga operasyon..
Mopahigayon usab og livelihood orientation ang DOLE-7 karong Agosto 1 ug 2 sa Lapu-Lapu City Sports Complex nga nahimutang sulod sa compound sa city hall, matud ni Francisco.
Gibutyag usab niya nga nagpaabot usab sila sa listahan sa mga trabahante gikan sa Human Resource Department sa duha ka kompanya sa MEPZ, nga i-endorso sa Department of Social Welfare and Development (DSWD) alang sa posibleng tabang.
Daghang mga retrenchment ang natala sa mga locator sa sulod sa MEPZ sa miaging mga bulan tungod sa pandemya ug pagtaas sa inflation rate, matud pa sa mga eksperto.
