CEBU CITY-Giaprobahan sa Cebu Provincial Board niadtong Lunes, Disyembre 18, ang Supplemental Budget Number 2 sa Kapitolyo nga adunay gahin nga P81.7 milyones.
Gipamatud-an kini nga dinalian ni Gobernador Gwen Garcia, nga nagtugot niini nga mapasar sa una, ikaduha, ug ikatulo nga pagbasa sulod sa usa ka adlaw sa sesyon.
Kini ubos sa supplemental budget diin ang 1,290 ka elected, appointment, permanent, casual ug co-terminus employees ang makadawat og “Christmas bonus” nga nagkantidad og P40,000.
Sa maong kantidad, P25,000 ang masakop sa Collective Bargaining Agreement Incentive ug laing P15,000 ang ipasaka batok sa Service Recognition Incentive, nga gitugutan sa Administrative Order No. 12 ni Presidente Ferdinand Marcos Jr.
Dugang niini, ang 2,010 ka mga job order employees sa Kapitolyo makadawat usab og P15,000 isip Premium ug Gratuity Pay sa mga JOs ubos sa COA-DBM Joint Circular No. 2, s. 2020 nga giamendar ni JC No. 2, s. 2022 ug/o AO No. 13 sa Gratuity Pay.
Naglakip usab ang mga empleyado sa Kapitolyo sa executive ug legislative branches, ingon man kadtong na-assign sa income-generating enterprises ug social services providers sama sa North ug south bus terminals nga gipadagan sa Kapitolyo ug 16 ka provincial ug district hospitals, ug uban pa.
