Gipahigayon karonga adlawa ang pagtanyag sa 20 pesos nga bugas subay sa pagpatuman sa programang Benteng Bigas Meron Na, nga gipahigayon sa Plaza Sugbo atubangan sa Cebu City Hall, Marso 30, 2026.
Ang maong 20 pesos matag kilo nga bugas gitagana alang sa mga vulnerable sectors diin magsugod ang pagtanyag niini sugod karong adlawa, ug hangtud na Miyerkules, Abril 1.
Ubos sa maong programa, ang suplay sa bugas naggagikan sa National Food Authority (NFA), ug ipang apod-apod kini sa mga konsumedor sa matag Kadiwa Centers o sa mga Bigasan ng Bayan.
Diin, matag kwalipikadong benipesaryo niini mamahimo ug tugutan lang nga makapalit og 30 ka kilo sulod sa usa ka buwan, apan karong adlawa, 10 lang kakilo ang gitugotang mabitbit sa matag kwalipikadong konsumedor aron klarong ma apod-apod kini sa kadaghanan.
Samtang sa North District schedule (Marso 30, 2026), ang mga barangay nga naglangkob niini mao ang Barangay Santo Niño, Barangay San Roque, ug Barangay Tejero.
Ingun man ugmang adlawa, Marso 31, ang mga barangay nga naglangkob niini mao ang Barangay Tinago, ug Barangay Day-as.
Sa sunod nga adlaw usab, Abril 1, ang mga barangay nga naglangkob niini mao ang Barangay Ermita, ug Barangay Pari-an, ug mao kini ang kinatibuk-ang barangay sa North District areas.
Samtang sa South District schedule (Marso 30, 2026), nga gipahigayon sa Cebu City Sports Institute nga gisugdan kaganinang alas 9:00 sa buntag.
Diin ang mga barangay nga naglangkob niini mao ang Barangay Pasil, Barangay Suba, ug ang Barangay Sawang Calero.
Ingun man ugmang adlawa, Marso 31, sa susamang distrito, ang mga barangay nga naglangkob niini mao ang Barangay Duljo, Barangay Pahina San Nicholas, ug Barangay Pahina San Nicholas Proper.
Ingun man igka Miyerkules, Abril 1 sa susamang distrito, gilangkoban kini sa mga barangay sama sa Barangay Mambaling ug Barangay San Nicholas.
Sumala pa, ang maong programa nagsiguro ug giprayoridad nga mga konsumidor mao ang mga senior citizen, solo parents, Person with Disabilities (PWD), Indigenous household apil niini ang mga 4P’s beneficiaries , mag-uuma mga mangngisda, jeepney ug tricycle drivers, minimum wage earners, teaching ug non-teahing personnel sa DepED, ug identified beneficiaries sa Department of Agriculture (DOA).
Subay niini, gikabutyag ni Cebu City Councilor Dave Tumulak bisan adunay pagka-brownish ang kolor sa bugas, gipaniguro niini nga bag-o kining ani sa NFA ug wala kini na-stock o napundo.
Ingun man gitataw nga ang kining inisyatiba gilatid nga magpadayon hangtud sa sunod nga mga buwan, ug malibot ang uban pang barangay sa dakbayan sa Sugbo.
Dugang usab pasabot ni Tumulak nga mamahimong mopalit ang naasoyng benepisarsyo sa bisan asang Bigasan ng Bayan sa NFA, mamahimo rang moadto, tungod kay aduna say online registration.
Ingun man human niining lugar karon nga gipahigayon nga pagpang apod-apod sa Cebu City Sports Institute ug sa Plaza Sugbo, sa sunod nga ipahigayon na kini sa matag barangay.
