Gipakusgan sa Kagamhanan sa dakbayan sa Sugbo ang pag-monitor ug mga lakang sa pagkontrol sa sakit human nakumpirmar ang presensya sa African Swine Fever (ASF) sa mga baboy nga gipang-atiman sa mga backyard raiser sa usa ka lugar sa siyudad nga nataptan niini.
Ang mga resulta gikan sa Department of Agriculture Regional Animal Disease Diagnostic Laboratory nagkumpirma sa ASF viral DNA sa mga sample sa dugo nga nakuha gikan sa mga lugar diin adunay backyard hog-raising.
Busa, pinaagi sa Department of Veterinary Medicine and Fisheries (DVMF) ang Kagamhanan sa Siyudad sa Sugbo nagpatuman na og pipila ka mga lakang aron mapugngan ang pagkuyanap sa sakit.
Naglakip kini sa pagpalapad sa mga lakang sa pagkontrol sa utlanan tali sa mga barangay sa mga lugar nga giila nga “hotspot” sa ASF aron makatabang sa pagpugong sa paglihok sa mga hayop nga posibleng nataptan.
Atol sa pakighinabi sa Bombo Radyo Newsteam kang Cebu City Councilor Dave Tumulak, gikumpirmar niini ang paglubong sa 57 ka mga baboy nga gituohang nataptan sa sakit nga ASF.
Sumala sa giluwatang pahayag ni Konsehal Tumulak, ang maong paglubong sa mga binuhing hayop aron mapanalipdan ang panglawas ug kaluwasan sa publiko.
Gipasabot ni Tumulak nga ang maong lakang gihimo pinaagi sa proseo sa Department of Veterinary Medicine and Fisheries (DVMF) protocol, diin ang mga baboy mahimong ilubong o daoban aron masiguro nga dili na makatakod ang virus. Iyang gidugang nga ang paglubong gihimo mismo sa kaugalingong yuta sa mga nanag-iya sa maong mga baboy.
