Gipalapdan sa Cebu Provincial Veterinary Office (PVO) ang ilang surveillance sa Ginatilan human nakumpirma ang presensya sa African Swine Fever (ASF) sa duha ka barangay niini.
Matod ni Provincial Veterinarian Dr. Mary Rose Vincoy, tulo sa upat ka inisyal nga mga sample nga nakuha sa Ginatilan ang nagpositibo sa ASF, diin ang mga positibong sample gikan sa mga baboy sa Barangay Cagsing ug Calabawan.
Basi sa resulta gikan sa Department of Agriculture 7 Regional Animal Disease Diagnostic Laboratory, miingon si Vincoy nga gihimo na karon ang surveillance sa tanang 14 ka barangay sa Ginatilan.
Tumong sa gipalapdan nga surveillance ang pagtino kung aduna bay posibleng impeksyon gawas sa duha ka barangay nga unang natumbok.
Sa pagkakaron, gipatuman na sa Lungsod sa Ginatilan ang mga restriksyon sa paglihok ug pamatigayon sa kahayupan ubos sa executive order nga gipagawas ni Mayor Roy Vincent Singco niadtong Setyembre 19, 2026.
Diin ubos sa maong mando, gidili ang pagsulod ug paggawas sa mga baboy sa Cagsing ug Calabawan kung walay una nga sinulat nga clearance gikan sa Municipal Agriculture Office ug PVO.
