Gipahimangnoan sa Cebu City Department of Veterinary Medicine and Fisheries (DVMF) ang tanang mga biyahedor sa baboy ug mga operator sa motor-banca nga kinahanglang mosunod sa mga resikitos nga gipatuman sa siyudad sa pagdala og buhing baboy ug mga produkto pasulod sa siyudad aron nga mapalig-on ang biosecurity measures batok sa hulga sa African Swine Fever (ASF).
Subay sa memorandum nga giluwatan sa DVMF nga ang maong lakang gisubay sa gipirmahan nga sa Executive Order No. 86 ni Mayor Nestor Archival, Sr. aron mapanalipdan ang lokal nga industriya sa baboy ug mapugngan ang pagsulod sa mga sakit sama sa ASF.
Kinahanglan nga makakuha sa tukmang mga permit ug sertipikasyon sa dili pa makasulod sa siyudad alang sa tanang magdala og buhing baboy ug mga produktong baboy.
Gikinahanglan usab alang sa mga buhing baboy nga gikan sa laing probinsiya ang Recognition of Active Surveillance sa African Swine Fever ug Certificate of ASF-Free Status nga giisyu sa Provincial Veterinary Office sa lugar diin gikan ang mga hayop.
Kinahanglan usab nga adunay ASF Negative Test Result, Veterinary Health Certificate nga nagpakita nga ang destinasyon mao ang Cebu City ug adunay Local Shipping Permit nga giisyu sa Bureau of Animal Industry-National Veterinary Quarantine Service.
Kinahanglan usab ang Livestock Handler’s Permit nga giisyu sa Department of Agriculture ug ang Certificate of Acceptance nga giisyu sa Cebu City DVMF.
Kinahanglan nga adunay Meat Inspection Certificate, alang sa mga karneng baboy ug uban pa’ng parte niini nga buot nga ihatod sa siyudad alang sa kadtong bag-ong giihaw nga karne o Certificate of Meat Importation alang sa imported nga mga produkto nga giisyu sa National Meat Inspection Service.
