PROVINCE OF BOHOL- Nagpatuman og 60 ka adlaw nga temporaryong pagdili ang kagamhanang probinsyal sa Bohol sa pagsulod sa mga buhing baboy, karne, ug tanang produkto sa baboy gikan sa Negros Island aron mapanalipdan ang probinsya batok sa African Swine Fever (ASF).
Gipahibalo ni Bohol Governor Erico Aristotle “Aris” Aumentado nga iyang gipirmahan ang Executive Order No. 28, Series of 2026, gahapon Hulyo 3, nga naglatid sa pagdali sa mga kargamento gikan sa Negros Oriental ug Negros Occidental.
Gihimo ang maong dinalian nga lakang human madiskubrehan ang mga bag-ong kaso sa ASF didto sa isla sa Negros.
Sumala ni Aumentado, tinguha sa temporaryong ban nga maprotektahan ang tibuok industriya sa baboy sa Bohol ug mapugngan ang pagsulod sa maong makatakod nga viral disease sa lalawigan.
Nanawagan usab ang gobernador sa publiko, mga hog raisers, mga negosyante, ug sa mga hingtungdang ahensya nga mokooperar sa pagpatuman sa maong kamandoan ug mosunod sa mga biosecurity protocols aron masiguro nga luwas ang probinsya.
Ang African Swine Fever (ASF) usa ka grabeng sakit nga makaapekto sa mga binuhing baboy ug mga baboy-ihalas.
Bisan dili kini delikado sa tawo, nagdala kini og dako nga kadaot sa industriya sa baboy tungod sa taas nga mortality rate ug paspas nga pagkatakod niini.
