Gipahugtan na sa Bohol Police Provincial Office ang mga pagpangandam sa seguridad alang sa pag-host sa probinsya sa CHED-ASEAN meetings nga gikatakdang ipahigayon sa Panglao, Bohol, gikan sa Nobyembre 23 hangtod 26, 2026.
Gilauman nga motambong sa maong regional meetings ang mga heads of delegation, senior officials, education ministers, kauban ang ilang mga kapikas, ug uban pang bisita gikan sa mga nasod nga sakop sa Association of Southeast Asian Nations.
Atol sa pakighinabi sa Bombo News Team kang PMaj. Joseph Lopena, spokesperson sa PNP Bohol, giandam na ang security plan ug deployment sa mga personnel aron masiguro ang kalinaw, kahapsay ug kaluwasan sa tanang delegasyon ug sa mga bisita atol sa maong kalihokan.
Diin ang deployment sa mga personnel gikatakdang sugdan sa Nobyembre 21 ug magpadayon hangtod Nobyembre 29, o bisan human sa pagtapos sa mga meeting, aron masiguro nga luwas ang mga delegasyon hangtod sa ilang pagbiya sa probinsya.
Sa initial security plan, kapin sa 800 ka personnel ang giandam nga i-deploy, diin 500 niini naglangkob sa personnel gikan sa Bureau of Fire Protection, Philippine Coast Guard, Armed Forces of the Philippines, ug uban pang nagkalain-laing ahensiya.
Pangulohan usab kini ni Bohol Police Provincial Director PCol. Patricio Degay Jr. ang ASEAN Task Group nga maoy responsable sa pagpatuman sa mga security measures, in coordination sa provincial ug municipal governments ug uban pang mga law enforcement agencies.
Gibutyag ni Lopena nga padayon ang inter-agency coordination meetings aron masiguro ang hapsay nga pagpatuman sa security plan, lakip ang paghan-ay sa deployment, pagtinabangay sa mga ahensiya, ug pag-andam sa mga personnel sa wala pa, atol, ug human sa maong kalihokan.
Gikatakda usab nga ipahigayon ang send-off ceremonies sa mga personnel sa Saint Augustine Church grounds sa barangay Poblacion, Panglao, sa Nobyembre 21, isip kabahin sa formal deployment sa mga puwersa sa seguridad.
Gipasiugda sa kapulisan nga ilang tumong ang zero security incident atol sa pag-host sa Bohol sa maong ASEAN meetings, ilabi na sa pagseguro sa kaluwasan sa mga delegasyon ug uban pang mga bisita nga moabot sa probinsya. via Bombo Jemmaica Mayor











