Nababagan sa mga lokal nga awtoridad ang 150 ka mga binuhing baboy nga walay tukmang mga dokumento ug nagkantidad og P1.3 milyon sa lungsod sa Getafe, isip kabahin sa kampanya sa probinsya sa Bohol batok sa pagkatap sa African Swine Fever (ASF).
Ang pagkumpiska nakahatag usab og dakong tabang sa padayon nga paningkamot sa Bohol nga makabangon gikan sa epekto sa ASF sa lokal nga industriya sa baboy, samtang naningkamot ang gobyerno sa probinsya nga mapuno pag-usab ang populasyon sa mga baboy sa lugar.
Matud sa provincial government nga nasuta nga ang karga gikan sa Dumanjug, Cebu, ug giberipika usab sa mga awtoridad ang mga taho nga ang karga gikan sa Negros.
Gibutang sa quarantine ang mga hayop, ug gihatagan og 24 ka oras ang tag-iya aron ipakita ang gikinahanglang mga dokumento.
Apan, wala makatuman ang tag-iya, hinungdan nga gihimo sa mga awtoridad ang makatawhanong paglabay sa mga baboy pagkasunod adlaw subay sa mga protocol. Samtang, ang mga patay nga baboy gilubong dayon sa gitakdang lugar sa Barangay Taytay, nga anaa usab sa Getafe.
Subay niini, giawhag sa Bohol Capitol ang mga tag-iya sa kahayupan, mga negosyante, ug mga transporter nga mosunod sa mga rekisitos sa probinsya alang sa pagsulod ug pagpadala sa mga hayop. Ingon man ang pag-awhag usab niini sa publiko nga ireport ang gidudahang dili awtorisadong animal movements.
