Patay ang usa ka 43 anyos nga lalaki human kini gidunggab sa iyang 39 anyos nga igsuon tungod sa panaglalis didto sa Sitio NGA, Brgy. Lahug, Dakbayan sa Sugbo pasado alas 7:45 sa gabie kagahapong adlawa. Oktubre 19, 2026
Ang biktima mao si Francis Pagobo Flores, 43 anyos, panday, residente sa Sitio NGA, Brgy. Lahug, Dakbayan sa Sugbo
Samtang ang suspek mao ang iyang igsuon nga si Jerry Pagobo Flores, 39 anyos, mason, residente sab sa maong dapit
Base initial nga imbestigasyon sa Mabolo Police Station sa pagpangulo ni PMAJ Thomas Ed Taghoy, nahitabo ang insidente pasado alas 7:45 sa gabie didto sa Sitio NGA, Brgy Lahug, Cebu City diin gikataho nga nagkalalis ang gitudlong hinungdan sa maong insidente
Apan sa pakighinabi sa Bombo Radyo Cebu News Team ngadto sa suspek nga si Jerry Pagobo iyang giangkon ang maong krimen ug siya mirason nga nabuhat niya ang maong krimen tungod kay iyang nakita ang iyang igsuon nga biktima nga mikulata sa iyang 17 anyos nga anak mao nga kalit mingitngit ang iyang panan-aw sa kalagot hinungdan nga iyang nadunggban ang iyang maguwang nga si Francis
Nakahiagom ang biktima ug duha ka samad dinunggaban sa dughan ginamit ang kitchen knife nga miresulta sa kamatayon niini
Dugang pa ni Jerry, dugay nang nagpugong siya sa iyang kalagot ngadto sa iyang igsuon tungod sa ilang dugay nang panagbangi ug sa insidente sa pagpamun-og sa biktima ngadto sa mga anak sa suspetsado
Padayon ang imbestigasyon sa kapulisan sa maong panghitabo diin kasamtangang gibalhug sa Mabolo Police Station ang suspek ug gikatakda kini nga pasakaan og kasong murder.
