CEBU CITY- Patay ang usa ka 43-anyos nga lalaki human gidunggab sa iyang kaugalingong manghod atol sa panaglalis sa Sitio NGA, Barangay Lahug, Dakbayan sa Sugbo, pasado alas 7:45 sa gabii niadtong Lunes, Oktubre 19, 2026.
Giila ang biktima nga si Francis Pagobo Flores, 43 anyos, usa ka panday ug residente sa maong lugar. Ang giingong suspek mao ang iyang manghod nga si Jerry Pagobo Flores, 39 anyos, usa ka mason nga nagpuyo usab sa maong barangay.
Base sa inisyal nga imbestigasyon sa Mabolo Police Station ubos sa pagpangulo ni Police Major Thomas Ed Taghoy, panaglalis ang gituohang hinungdan sa insidente.
Sa pakighinabi sa Bombo Radyo Cebu News Team, giangkon ni Jerry ang pagdunggab sa iyang maguwang. Matod niya, nakit-an niya nga gikulata sa biktima ang iyang 17-anyos nga anak, hinungdan nga napuno siya sa kalagot ug nadunggaban ang iyang magulang.
Duha ka samad dinunggaban sa dughan ang nahiagoman sa biktima human siya dunggaba gamit ang kutsilyo sa kusina, nga miresulta sa iyang kamatayon.
Dugang pa sa suspek, dugay na siyang nagdumot sa iyang maguwang tungod sa ilang kanhing mga panagbangi ug sa mga giingong insidente sa pagpangulata sa biktima sa iyang mga anak.
Sa pagkakaron, anaa sa kustodiya sa Mabolo Police Station ang suspek samtang nagpadayon ang imbestigasyon sa kapulisan. Gikatakdang pasakaan siya og kasong murder kalabot sa maong insidente.
