CEBU – Di mominos sa 44 ka mga floating cottage sa lungsod sa Cordova sa Isla sa Mactan, Sugbo ang giguba sa mga awtoridad sa mando ni Mayor Cesar Suan ug sa Kagamhanan sa Probinsiya sa Sugbo.
Kung diin si Police Major Michael Gingoyon, hepe sa Cordova Police Station, maoy nangulo sa demolisyon nga nagsugod karung adlawa Martes, Oktubre 25, 2022, uban sa mga operatiba sa Naval Forces Central ug Maritime police.
Kini human nagpagawas og Executive Order(EO)No. 19, si Gov. Gwendolyn Garcia nga nagdili sa pagtukod sa mga illegal nga floating cottage sa mga lugar sama sa mangrove zone, public beach zone, ug municipal fishing zone.
Ang E.O ni Garcia susama usab sa E.O No.1 ni Cordova Mayor Cesar Suan nga nag dili usab sa pagtukod sa bisan unsa nga cottage nga sakop sa easement zone sa maong lungsod.
Gipahimug-atan ni Garcia basi sa iyang EO ang mga nagkadaiyang problema nga naglambigit sa kalikupan o environment.
Kahinumduman nga gidagsa sa mga tourista ang maong lungsod gumikan sa kanindot sa ilang mga floating cottage.
