Naugdaw ang dili moubos sa 45 ka panimalay human miulbo ang dakong sunog kagabii sa Upper Cadicay, Brgy. Lawaan 3, sa dakbayan sa Talisay.
Nadawat sa mga kabumberuhan ang alarma sa takna nga alas-11:38 sa gabii ug giisa kini sa first alarm.
Nakontrolar sa mga sakop sa BFP-Talisay City ang ka’yo ug gideklarar nga fire out pasado ala-una sa kaadlawon kaganiha.
Matud ni Fire Officer 2 Junriel Siaboc nga nagsugod ang maong sunog sa panimalay nilang Alex Tamas.
Giimbestigaran pa sa mga kabumberuhan kung unsa man ang hinungdan sa maong dakong sunog.
Mokabat ang danyos niini ngadto sa P12,000.
Nagkanayon usab ang head sa City Disaster Risk Reduction and Management Office nga si Alvin Santillana nga nakig-alayon na sila sa City Social Welfare Office alang sa assessment.
