Ubay-ubay pa nga mga bagyo ang naghulga ug gipaabot nga mosulod sa Philippine Area of Responsibility (PAR) karong ‘ber’ months.
Matod sa state weather bureau, aduna pay 9 ka bagyo ang gibantayan nga mosulod sa nasod sa dili pa matapos ang tuig.
Kini may kalambigitan sa La Niña Alert nga gipahibawo sa state weather bureau diin 70% o labaw pa ang posibilidad sa La Niña formation ang gipaabot karong buwan sa Oktubre hangtod sa Disyembre ug mahimong magpadayon hangtod sa Pebrero 2026.
Matod ni Deputy Administrator sa state weather bureau, Marcelino Villafuertee, nga ang posibleng maporma nga ika-16 nga bagyo tawgon og “Paolo” ug aduna pay 5 ngadto sa 9 ka tropical cyclones nga mosulod sa PAR hangtod sa katapusan sa tuig 2025.
Bisan og wala gipaabot nga mas kusog pa ang umaabot nga mga bagyo kaysa sa nangagi, nangandam gihapon sila sa ilang pagsulod aron malikayan ang mas dagkong mga epekto.
Sa laing bahin, gipahinumdoman ni Villafuerte ang publiko nga mag-andam kanunay, ilabina sa Kabisay-an ug Mindanao tungod kay mao kini ang mga dapit nga posibleng maigo sa gipaabot nga mga bagyo.
