Gilaslasan sa Committee on Budget and Finance, sa legislative department sa Kagamhanan sa Sugbo og P25 Million ang sugyot nga P50 Million nga Supplemental Budget gikan sa opisina ni Cebu City Mayor Nestor Archival inubanan usab ni Cebu City Vice-Mayor Tomas Omena alang sa pagpanindot sa legislative building.
Matud ni Cebu City Councilor Dave Tumulak, ang Chairman sa Committee on Budget and Finance, nga ilang gilaslasan una og katunga ang sugyot nga supplemental budget ngadto na sa P25 Million, kini gumikan kay wala pay naporma nga igong plano bahin niini apan, bana-bana lang sa kantidad nga posibleng magasto ang gisugyot.
Sigon niini, gilaslasan usab ang kinatibuk-ang pundo gikan sa P900 Million nahimo nang P800 Million ang posibleng maaprobahan sa konseho ugmang adlaw Abril 28, 2026, aron makapadayon sa pag-implementar sa mga programa og proyekto ang kagamhanan sa Sugbo.
Giklaro usab ni Tumulak, nga taliwala sa paglaslas niini, dili angay mabalaka ang ehekutibo gumikan kay ang anaa na ang pundo nga posibleng gamitan sa bisan unsang matang nga emerhensiya.
Gihimug-atan niini nga giaprobahan usab sa komitiba ang mga hinabang nga giandam alang sa mga habal-habal drivers sa dakbayan sa Sugbo, gumikan kay mahinungdanon kini alang sa mga benepisyaryo hilabi na sa mga nakasinati sa krisis.
Lauman nga igoun sa kagamhanan ang pagpang-apud-apod sa hinabang nga P35M alang sa mga habal-habal drivers apan gitun-an pa usab kung lakip ba usab nga makadawat niini ang mga mag-uuma.
Samtang, gilaslasan usab sa komitiba og P100 Million ang sugyot nga P500 Million nga pundo alang sa pagpalabay sa basura sa dakbayan ngadto na sa Aloguinsan.
