CEBU CITY-Anaa sa 4,000 ngadto sa 5,000 ka police ug military personnel ug force multipliers ang ipakatap atol sa solemn procession alang sa Sinulog 2024 aron paghatag og seguridad sa maong kalihukan.
Tungod sa nagpadayon nga Bus Rapid Transit nga proyekto, ang itinerary sa mga kalihokan sama sa Walk with Jesus ug Walk with Mary giusab alang sa Sinulog 2024.
Ang solemne nga prosesyon magsugod sa Basilica ug mobiyahe pinaagi sa mosunod nga mga dalan: Leon Kilat, Borromeo, Natalio Bacalso, V. Rama, B. Rodriguez, General Maxilom, F. Ramos ug Junquera. Moliko dayon kini sa tuo sa dalan Colon, dayon wala sa Osmeña Boulevard sa dili pa mobalik sa Basilica.
Matod ni Police Lieutenant Colonel Janette Rafter, ang deputy city director for operation sa Cebu City Police Office (CCPO), nga andam silang mopatuman og hugot nga security protocols alang sa kasaulogan sa Sinulog.
Samtang si Lieutenant Colonel Gerard Ace Pelare, tigpamaba sa Police Regional Office (PRO 7), sa iyang bahin, niingon nga usa sa ilang buhaton mao ang pagsiguro sa kaluwasan sa mga bisita, ilabi na ang pagpanalipod kanila gikan sa gagmay nga mga krimen sama sa pagpangawat ug snatching.
Giawhag sa kapulisan ang publiko nga ampingan ang ilang mga mahalon nga butang kung magsuroysuroy sa siyudad.
