CEBU – Mokabat sa 51 ka mga establisemento ang nag-atubang og demolisyon tungod kay ang City Government mopagawas na sa ilang mga tag-iya og notices tungod sa paglapas sa three-meter easement sa daplin sa mga suba ug uban pang agianan sa tubig.
Lakip niini ang Gaisano Main, Dimsum Break, 138 Mall ug Colonnade Mall sa Colon St. nga nahimutang sa may Estero de Parian, ug Prince Court sa Mabolo, nga anaa sa daplin sa Mahiga River.
Sa Task Force Gubat sa Baha meeting sa Mayor’s Conference Room, si kanhi environment Secretary Roy Cimatu nihatag sa mga river commander sa Estero Pari-an ug Mahiga river sa go signal sa pag-isyu sa mga notice.
Kung diin mokabat sa Singkwenta ka establisemento sa daplin sa suba sa Estero de Parian ang makadawat sa abiso karong Lunes, Nobyembre 28, butyag ni river commander Raquel Arce.
Samtang ang Prince Court ihatod sa pahibalo sa unang semana sa Disyembre.
