CEBU – Gitaktak na sa kagamhanan sa dakbayan sa Lapu-Lapu ang 6 ka mga kawani sa city hall nga nagpositibo sa paggamit og ilegal nga drugas.
Kini ang gikompirmar ni Garry Lao, pangulo sa City of Lapu-Lapu Office for Substance Abuse Prevention (CLOSAP).
Matod ni Lao nga nipagawas na og memorandum ang City Administrator’s Office nga nagkompirmar sa pagtaktak sa mga empleyado nga gilangkuban sa duha ka casual ug upat ka job order.
Una nang nagpahigayon og drug test ang CLOSAP niadtong Hunyo 1 ug 9, aron maseguro nga drug-free ang palibot sa city hall.
Hinuon, nagkanayon si La nga nagpaabot pa sila sa resulta sa confirmatory test sa unom ka mga empleyado nga gipaabot nga moabot sunod semana.
Girekomendar usab sa opisyal nga ipaubos sa community based-drug rehabilitation program (CBDRP) ang mga empleyado aron mahatagan sila og kahigayonan nga makatrabaho pag-usab sa city hall.
