KYIV, UKRAINE – Patay ang labing menos unom ka tawo samtang 14 ang nasamdan human ang usa ka lalaki nagpabuto ug mihimo og hostage-taking sa siyudad sa Kyiv niadtong Sabado, matod sa mga opisyal sa Ukraine.
Sumala kang Interior Minister Ihor Klymenko, nahitabo ang insidente sa distrito sa
Holosiivskyi sa habagatang bahin sa siyudad, diin ang suspek giingong namusil sa kadalanan sa wala pa mokuha og mga hostage sulod sa usa ka supermarket.
Giingon sa mga awtoridad nga napatay ang suspek sa mga pulis human sa pinusilay sulod sa supermarket.
Sa pagkakaron, wala pa’y klarong motibo sa krimen.
Matud ni Ukraine President Volodymyr Zelensky, nga upat ang namatay sa kadalanan, usa sa ospital, ug usa pa ka hostage ang gipatay sa suspek, samtang upat ka hostage ang naluwas human sa negosasyon nga milungtad og mga 40 minutos.
Giila sa mga awtoridad ang suspek isip 58-anyos nga lalaki gikan sa Moscow nga migamit og automatic rifle.
Padayon pa ang imbestigasyon sa insidente, lakip ang iyang armas permit ug posibleng koneksyon sa rehiyon sa Donetsk.
Samtang, giingon sa mga opisyal nga talagsa ra ang maong klase sa pag-atake sulod sa Kyiv, bisan pa sa padayon nga tensyon tungod sa gubat sa Russia.
