Nakahiagom og samad dinunggaban ang 60-anyos nga taxi driver human gitulis sa 29-anyos nga pasahero niini sa may Bagsakan, SRP, Barangay Mambaling, dakbayan sa Sugbo alas 6:20 ganihang buntag ning adlaw sa Sabado, Nobyembre 7, 2026.
Giila ang biktima sa alyas nga ‘Beny’ 60 anyos, taxi driver ug taga Calawisan, dakbayan sa Lapu-Lapu. Samtang ang suspect giila sa alyas ‘John’ taga Barangay Inayawan ning siyudad.
Basi sa impormasyon sa Mambaling Police Station 11, ang suspect nisakay sa may bakery sa Alumnos, Barangay Basak San Nicolas. Gipaagi matod pa sa suspect ang taxi sa may Bagsakan ug pag-abot sa may taytayan didto na nideklarar og tulis ang suspect.
Dihang mogawas na unta ang suspect sa taxi human manulis gi-lock sa taxi driver ang sakyanan hinungdan nga nasuko ang suspetsado ug gidunggab ang biktima gamit ang kitchen knife.
Nakaangkon ang biktima ug duha ka samad dinunggaban sa tuo nga kamot niini ug gidala ang biktima sa Cebu City Medical Center. Samtang ang suspect misuway og ikyas apan nadakpan dayon kini sa kapulisan tungod kay duna ‘y naka report sa insidente ug pinaagi usab sa abag sa mga tawo sa dapit.
Gisusi pa sa kapulisan kung dunay kauban ang suspect sa pagplano sa krimen ingon man kun duna kini record sa laing pang krimen. Kasong frustrated homicide ang ipasaka batok sa suspetsado.
