CEBU CITY– Wala nay naabtan nga balay ang usa ka magti-ayon sa may Baranggay San Juan, isla sa Camotes human kini masunog.
Matud ni Police Corporal Ruben Aguilar sa Pilar Police Station nga nakadawat sila og fire alarm sa naasoy nga lugar sanglit wala diay bombero ang naasoy nga area.
Matud usab sa tag-iya sa balay nga si Romeo Martines Donaire kinsang milakaw kauban ang iyang misis niadtong higayona, nga wala sila’y nahinumduman nga nabiyaang gisaksak nga appliances sa sulod nga posibleng hinungdan sa sunog.
Tungod kay walay bombero ug pulis lamang ang miresponde sa nahitabo-an, naugdaw ang balay ni Donaire ilabina usab kay ginama lamang kini sa light materials.
Muabot sa 70,000 pesos ang danyos sa naasoy nga sunog.
Wala hinooy nataho nga naangol o namatay sa maong panghitabo.(FDP/SBR)
