Giobserbar karon sa Kristiyanong Katoliko ang pasko sa pagkabanhaw, kini nagtumong sa paghandom sa kadaugan ni Hesus batok sa kamatayon ug sa Iyang Pagkabanhaw, ang tradisyonal nga “Sugat,” diin gipasundayag usab kini sa atubangan sa The Cebu Metropolitan Cathedral.
Ang “Sugat” mao ang panagtagbo sa mga imahen sa Nabanhaw nga Kristo ug sa Birhen Maria sa kaadlawon diin ang usa ka anghel, nga nagkanta sa Regina Coeli, manaog aron kuhaon ang itom nga tabil sa kasubo gikan sa imahen sa Birhen Maria isip simbolo sa katapusan sa iyang pagbangotan sa kamatayon sa iyang Anak.
Subay niini, gisuta sa Bombo Radyo Cebu newsteam ang habig sa mga kaigsuonan nga anaa sa langyaw nga nasud, nanimpad, ug kung aduna basay susamang kalihokan subay na sa “Pasko sa Pagkabanhaw.”
Eksklusibong gikuha sa Bombo Radyo Cebu ang linya ni Deney Astano, ang Bombo International News Correspondent sa nasud nga Lebanon, ug iyang gibutyag nga swerte sila karon sa kasamtangan gumikan kay gitugotan sila nga makasimba, ug gitugotan nga makasalmot sa tanang kalihokan sa kinatibuk-ang Semana Santa.
Hinungdan nga mapasalamaton kini sa maong kahigayonan nga aduna silay permiso nga buhaton ang mga relihiyosong aktibidad, ug dili susama sa ubang nasud nga hingpit gayud nga gibawalan.
