PROVINCE OF CEBU-Nigahin ang Department of Social Welfare and Development sa Central Visayas (DSWD-7) og P199 milyones aron pondohan ang kampanya niini sa pagminus sa pagkaylap sa malnutrisyon sa Probinsiya sa Sugbo karung tuiga 2023.
Uban sa budget, tumong sa ahensya nga masuportahan ang 79,000 ka mga bata, kansang edad gikan sa dos ngadto sa singko anyos sa Probinsiya sa Sugbo, apil na ang Mandaue City, pinaagi sa paggahin og P21 matag adlaw matag bata sulod sa 120 ka adlaw.
Gibutyag ni Romielene Padilla, nutritionist/dietician sa DSWD-7, nga ang Supplementary Feeding Program magsugod sa Septiyembre 3 hangtod sa Disyembre 31, 2023.
Nagtumong ang Supplementary Feeding program sa DSWD sa paghatag ug pagkaon dugang sa regular nga pagkaon. Diin target sa programa ang mga bata, kansang edad gikan sa 2 hangtod 3 anyos ug ubos sa supervised neighborhood play groups sa local government units (LGU), ug mga bata, kansang edad gikan sa 3 hangtod 5 anyos ug na-enrol sa Child Development Centers nga nailhan usab nga Day Care centers.
Apan tungod sa limitado nga pundo, gitambagan ang mga lokal nga kagamhanan sa highly urbanized cities (HUCs) sa Sugbo nga pundohan ang ilang feeding programs alang sa ilang child development centers.
Dugang pa ni Padilla nga ang dakbayan sa Sugbo, wala maapil sa ilang pagpatuman sa miaging tuig ug karong tuiga tungod kay ang gigahin nga gidaghanon sa mga benepisyaryo dili pa igo sa gidaghanon sa mga bata sa dakbayan sa Sugbo.
