CEBU – Mokabat sa 28 ka mga menor de edad ang naluwas atol sa ikatulong Oplan Bulabog sa Cebu City Police Office (CCPO) niadtong Huwebes sa gabii, Agosto 11, 2022.
Matud pa ni Police Lieutenant Colonel Wilbert Parilla, ang deputy director for administration sa CCPO, nga ang maong ihap mas ubos kung itandi sa gidaghanon sa mga menor de edad nga naluwas sa miaging duha ka adlaw.
Gumikan kay niadtong Miyerkules sa gabii, Agosto 10, naluwas sa kapolisan ang 68 ka mga menor de edad, ug 34 niadtong Martes, Agosto 9.
Matud pa ni Parilla nga ang downtrend nagpakita nga ang mga menor de edad, ilang mga ginikanan, ug mga guardian, nahibalo na sa Oplan Bulabog ug sa kasamtangan curfew alang sa mga menor de edad sa dakbayan, nga gikan sa alas 10 sa gabii hangtod alas 4 sa kaadlawon sa dakbayan.
Dugang pa, nga gahapon sa gabie Biyernes, Agosto 12, 2022, iapil sa kapulisan ang pagsusi sa mga internet cafe aron masuta kon tugutan ba ang mga menor de edad nga magpabilin niini.
Nasayran nga ang reimplementation sa Oplan Bulabog gihimo human sa pagpatay sa 16-anyos nga si Jerome Estan, usa ka Grade 10 nga estudyante sa Barangay Pahina-Central niadtong Agosto 6, 2022, sa Barangay Bulacao, dakbayan sa Sugbo.
