CEBU CITY — Mipasaka og kaso ang National Bureau of Investigation (NBI) batok sa walo ka mga opisyal sa Philhealth-7 ug upat ka mga kawani sa Perpetual Succour Hospital gumikan lang sa anomalosong claims alang sa mga COVID-19 patients.
Nagkanayon si NBI-7 Director Atty. Renan Oliva nga nasuta sa ilang imbestigasyon nga adunay fraudulent claims nga mokabat ngadto sa kapin P300,000.
Gipasabot niini nga adunay nahitabong “upcasing” aron makakuha og mas taas nga claims sa Philhealth ang Perpetual Succour Hospital.
Base sa ilang findings, tulo ka higayon nang nagnegatibo sa COVID-19 si “Patient X” apan gideklarar sa tambalanan nga nagpositibo ang pasyente sa coronavirus sa dihang namatay kini niadtong Mayo 16.
Nasayran usab nga wala malakip ang resulta sa iyang swab test alang sa pag-claim sa insurance sa Philhealth.
Dugang pa ni Oliva nga nakita sa medico legal nga non-COVID-19 pneumonia ang kamatayon ni “Patient X.”
Mag-atubang ang mga opisyal sa Philhealth ug mga kawani sa Perpetual og patung-patong nga kaso gawas sa kasong administratiba.
Kung mahinumduman, pipila ka mga reklamante ang midangop sa Bombo Radyo Cebu aron isumbong ang maong akusasyon kung diin, gi-lakip sa COVID-related deaths ang mga pasyente bisan pa man og wala natakdan sa maong kagaw.
