Patay ang usa ka 80 anyos nga lola human nabanggaan sa patrol car sa Jagna Municipal Police Station (MPS) ang iyang gisakyan nga traysikol niadtong Pebrero 8, sa National Highway sa Barangay Tangohay, lungsod sa Dimiao, Bohol.
Tulo pa ka pasahero, lakip na ang drayber sa traysikol, ang nasamdan sa insidente.
Matud ni PMaj. Rey Olar, ang tigpamaba sa Bohol Provincial Police Office, nga ang duha ka sakyanan nagbiyahe sa samang direksyon sa dihang nahitabo ang insidente.
Sumala ni Olar, ang mga biktima gikan sa usa ka simbahan samtang ang patrol car nga gimaneho ni PSMS Neil Vernel, 42, gikan sa Regional Trial Court sa Loay aron maghatud sa mga dokumento.
Dugang niini nga ang traysikol mihunong aron makakanaog ang namatay nga biktima ug ang iyang anak sa dihang aksidente kining nabanggaan sa usa ka patrol car nga nagsunod sa ilang luyo.
Tungod sa kusog sa impact, nadaot ang atubangan sa patrol car ug nalabay ang traysikol sa dagat, hinungdan sa mga kadaot sa mga pasahero ug kamatayon sa lola.
Sa pagkakaron, kasong reckless imprudence resulting in homicide and damage to property ang gisang-at batok sa drayber sa pulis.
Ug gitanggong kini sa Dimiao Municipal Police Station samtang giimbestigahan pa ang insidente.
Gipahinumdoman usab niya ang mga motorista nga mag-amping sa pagmaneho.
