CEBU CITY — Giimbestigaran sa mga sakop sa Bureau of Fire Protection (BFP) kung unsa ang hinungdan sa dakong sunog mga mitumaw sa Barangay San Roque, dakbayan sa Sugbo.
Kini human nga gilamoy sa ka’yo ang 80 ka mga panimalay sa Sitio Panting diin gituohang nagsugod kini sa panimalay ni Dana Bebs Portugal.
Matud ni Cebu Provincial Fire Marshall Fretzie Manatad nga gisuta pa nila kung unsa man ang hinungdan sa sunog nga giisa ngadto sa Task Force Alpha.
Apan nagkanayon ang barangay councilor nga si Duke Espina nga nasigpatan sa mga residente nga naguba ang electric wire ug natagak sa usa ka balay hinungdan nga mitumaw ang ka’yo. Hinuon walay naangol atol sa maong sunog.
Gibana-banag mikantidad sa 800,000 pesos ang pasiunang danyos sa maong dakong sunog.
Kasamtangang namakwit ang mga nasunugan sa barangay gymnasium sa Brgy. San Roque.
Matud sa head sa Department of Social Welfare and Services (DSWS) nga Dr. Jeffrey Ybones, anaa pa sa 133 ka mga pamilya ang apektado sa maong katalagman base sa ilang listahan.
Nahatagan usab og pagkaon ang mga nasunugan gikan sa DSWS.
Gibutyag ni Ybones nga posibleng ipaubos ang barangay sa state of calamity kung mahuman ang ilang proseso aron mapaspasan ang paghatag og hinabang sa mga nasunugan.
Samtang, gibana-banang mokantidad sa kapin 200,000 pesos ang danyos sa nahitabong sunog sa usa ka panimalay sa Brgy. Maguikay, dakbayan sa Mandaue.
Matud sa report gikan sa Mandaue City Fire Department nga mitumaw ang ka’yo gikan sa 3rd floor sa edipisyo nga gikatahong gipanag-iya ni Nick Soco.
Daling miresponde ang kabumberuhan sa nahitaboan sa sunog sa takna nga alas-5:47 sa hapon ug napalong kini pagkalabay sa kapin tunga sa oras.
Gisuta pa sa kabumberuhan kung unsa ang hinungdan sa maong sunog.
Pagkalabay sa pipila ka oras, daling girespondehan usab sa mga sakop sa Cebu City Fire Department ang laing sunog sa La Paloma Village, Brgy. Tisa, dakbayan sa Sugbo.
Matud ni Senior Fire Officer 2 Hermes Molina nga miulbo ang ka’yo gikan sa ikaduhang andana sa panimalay ni Ben Cuevas.
Nakadawat og alarma ang mga bumbero sa takna nga alas-9:24 sa gabii ug napawong kini pagkalabay sa 10 minutos.
Gitumbok ni Molina nga ang hinungdan sa maong sunog mao ang nagsiga nga vigil lamp.
Walay natalang mga namatay sa managsunod nga mga sunog gawas lang sa pipila ka mga fire volunteers nga nasamdan.
