Ipadangat sa Department of Labor and Employment Central Visayas (DOLE 7) ang 80 ka dugang personnel ngadto sa mga provincial ug district hospitals nga gidumala sa Kapitolyo sa Sugbo sulod sa siyam ka bulan.
Ubos sa Government Internship Program (GIP) sa maong ahensya, ang DOLE 7 maoy moabaga sa tanang galastuhan ug suhulan sa mga interns, hinungdan nga wala nay ipagawas nga pondo ang panudlanan sa probinsya alang niini, ug ang maong lakang gilauman nga makapagaan sa trabaho sa mga medical ug non-medical staff samtang naghatag og kahigayonan sa mga batan-ong graduates nga makasinati og aktwal nga trabaho sa gobiyerno.
Gipasabot ni Atty. Roy Buenafe, Regional Director sa DOLE 7, nga ang maong internship program gitumong alang sa mga batan-on gikan sa mga kabus nga pamilya aron mapakita ang ilang talento sa serbisyo publiko, ug ingun man nga madani ang mga takos nga indibidwal sa pagpanarbaho sa kagamhanan sa umaabot, ilabi na sa natad sa pamuo ug panarbaho.
Matod ni Buenafe, dako kini og ikatabang sa mga ospital aron mahatagan og gamayng lugak ang mga doktor, nars, ug uban pang kawani pinaagi sa tabang sa mga interns sa ilang inadlaw-adlaw nga gimbuhaton.
Gihangop usab ni Dr. Nikki Catalan, ang Capitol health consultant, ang maong inisyatiba tungod kay dako kini og tabang sa administrative ug digitalization nga tinguha sa hospital system sa probinsya. Sigon ni Catalan, ang mga interns makatabang sa clerical work, pagpadali sa mga PhilHealth claims, ug uban pang administratibong buluhaton, ilabi na nga ang mga batan-on karon hanas na sa teknolohiya ug Information Technology (IT).
Gidasig usab niya ang mga hepe sa mga ospital nga palakson ang skills training sa mga partisipante aron duna silay mapupo nga makahuluganon nga kasinatian inig human sa programa.
Samtang gitataw ni Atty. Buenafe nga ang mga malakip sa programa naglakip sa mga high school, college, ug technical-vocational graduates isip kabahin sa employment bridging program alang sa mga nangita og work experience. Ang mga partisipante dawatog suhulan gikan sa DOLE base sa prevailing regional minimum wage nga P540 matag adlaw.
Idestino sila sa mga non-clinical nga buluhaton sama sa document encoding, office support, tabang sa kusina, ug uban pang mga trabaho nga wala magkinahanglan og medikal nga kahibalo aron mabansay sila sa tinuod nga kalibutan sa panarbaho samtang nagserbisyo sa Probinsya sa Sugbo.
Kini nga programa kabahin usab sa paningkamot sa DOLE nga mapaspasan ang pagmonitor sa mga inisyatiba sa panarbaho ug social protection aron makab-ot ang kinatibuk-ang tumong nga makamugna og dugang trabaho ug maminusan ang kakubos sa rehiyon.
