DUMANJUG, CEBU-Gikatahong magpahigayon ang National Bureau of Investigation-7 og autopsy sa patayng lawas sa lola nga naputol ang ulo sa Barangay Candabong, lungsod sa Dumanjug.
Kini human nga nagpatabang sa NBI-7 ang pamilya sa 83-anyos nga si Miguela Pocong Barino aron ipasusi ang nahimong hinungdan sa kamatayon niini.
Mahinumdumanan nga nakaplagan sa pipila ka mga kabanay ang patayng lawas ni Lola Miguela niadtong Sabado diin gidudahang gitangag sa iro ang iyang ulo.
Midangop sa buhatan sa NBI-7 ang pag-umangkon sa senior citizen aron masigurado nila nga walay foul play ang kamatayon niini.
Matud ni NBI-7 Director Atty. Rennan Augustus Oliva nga kinahanglan ugkaton ang patayng lawas sa lola gikan sa sam-ang.
Apan, una ng gihatagan og pagklaro sa kapulisan sa Dumanjug uban sa mga sakop sa SOCO nga wala silay nakita nga foul play basi sa ilang imbistigasyon.
