SANTANDER, Cebu – Gituhu-ang gibugno sa sigbin ang usa ka lola hinungdan sa kamatayon niini sulod sa iyahang panimalay sa Barangay Candamyang, lungsod sa Santander.
Giila ang biktima nga si Maria Abraham Miras, 86 anyos, ug nag-inusara na lang sa kinabuhi.
Sa pakighinabi sa Bombo Radyo Cebu ni Police Master Sergeant Anthony Aba sa Santander PNP, gisaysay niini nga usa ka barangay treasurer ang mitaho kanila nga adunay patayng lawas nga nakaplagan hinungdan nga ilaha gilayon kini nga girespondihan.
Matud pa sa pulis nga ilahang nakita ang giingung lahi nga matang sa kamatayon kung diin sila mismo ang dili makasabut.
Gihulagway ni PMSg. Aba nga susamang gikaon ang biktima sa usa ka mabangis nga mananap.
Giingung bukog na lang ang makita sa tuo nga bukton kung diin gikan sa siko paingon sa kamot ang wala na’y unod ug bukog na lang ang nakita, samtang ang wala nga bukton ang giingung susamang nangalaksi.
Sigon pa nga basi sa istorya sa mga silingan nga susamang gi-ungo ang biktima apan gitataw ni PMSg. Aba nga dili kini gilayon nila matuhu-an ug magpadayon ang ilahang imbestigasyon.
Nasayran nga aduna na’y susama nga insidente sa pagkamatay ang natala kaniadto sa nahisgutang lugar diin nagpadayon sa gihapon nga katingalahan.
