CEBU – Gipangtaktak sa Police Regional Office (PRO)-7 ang siyam ka mga police officers human nga nagpositibo sa paggamit og ginadiling drugas.
Matud ni PRO-7 Director Brigadier General Debold Sinas nga naglangkub ang mga na-dismiss nga kapulisan gikan sa ranggo nga Patrolman ngadto sa Police Master Sergeant.
Tungod niini, mag-atubang usab og kasong kalapasan sa Comprehensive Dangerous Drugs Act ug administrative charges nga silang Patrolman Merlo Daclan Laborte, Patrolman Frances Maucesa, Patrolman Greggy Gica, Patrolman Jayrome Solano, Patrolman Joseph Tabo-tabo, Police Corporal Jose Marie Garcia, Police Corporal Gilfredo Carungay, Police Staff Sergeant Joffrey Mulat, ug Police Master Sergeant Darwin Gonzales.
Dugang pa ni Sinas nga gawas nga nagpostibo sila sa drug test, gipangrelibohan usab kini sa ilang mga pwesto.
Gibutyag usab ni Sinas nga giingong pulos mga ninja cops ang gipangdismiss nga mga pulis gumikan lang sa pag-recycle sa mga nasakmit nga ginadiling drugas.
Mipasalig kini nga dili itugot nga makapadayon sa pagserbisyo sa rehiyon ang mga ninja cops.
