Nipahigayon og protest-rally atubangan sa Land Transportation Franchising and Regulatory Board-7 (LTFRB-7) ang grupo sa transport nga National Confederation Transport Worker of Union, ug ubang ubay-ubay pa nga mga ride-hailing drivers.
Ang maong rally nagpunting sa hisgutanan kabahin sa panawagan sa nagpadayong krisis nga nasinati sa nasud, kinsa ang mga transport groups usa sa labing apektado gumikan sa nagpadayong saka sa presyo sa lana.
Mao kini ang gikabutyag ni Dennis Derige, ang tigpamaba sa Partido Manggagawa atol sa eksklusibong pakighinabi sa Bombo Radyo Cebu kaniya, diin iyang gidugang nga ilahang suwayan makig dayalogo sa bag-ong Regional Director sa LTFRB, diin usa sa ilang hisgutanan mao ang fuel subsidy gumikan sa giingong wala pa kini naabot sa Sugbo, ug ingun man ilang sutaon kung unsa ang mamahimong lakang niini.
Dugang ni Derige, lakip sa ilang pagasutaon kung ang naasoyng kantidad sa fuel subsidy igo na ba, gumikan kay ang ilahang critique niini giingong mura og “one time, small time.”
Diin ang pagsaka sa gasolina gipanglantawan nga one-time-big-time, apan ang ayuda, one-time-small-time.
Gitino usab ni Derige nga buot usab nila manawagan sa gibyerno nga papason na ang Oil Deregulation Law, suspensihon ang excise tax, ang Value Added Tax (VAT), ug hingpit nang ipatuman ang service contracting.
