Gisuspinde ni Presidente Ferdinand Marcos Jr. ang excise tax sa liquefied petroleum gas (LPG) ug kerosene human miabot sa US$99.41 matag baril ang kasagarang presyo sa Dubai crude oil.
Subay sa Executive Order No. 125, ang LPG temporaryong gipasaylo gikan sa excise tax, gawas kung gamiton kini isip raw material sa paggama og mga produktong petrochemical.
Apil usab sa suspensyon ang kerosene, gawas kung gamiton kini isip fuel sa eroplano.
Girekomendar sa Development Budget Coordination Committee (DBCC) ang maong lakang human gikumpirma sa Department of Energy (DOE) nga ang kasagarang presyo sa Dubai crude oil miabot sa US$99.41 matag baril, base sa Mean of Platts Singapore (MOPS), sulod sa miaging 30 ka adlaw.
Ang DBCC, uban sa DOE, magrepaso sa suspensyon human sa 15 ka adlaw ug matag bulan pagkahuman niana.
Mahimo silang morekomendar kang Presidente Marcos bahin sa pagpadayon, pag-usab, pagpalugway, o pagtapos sa suspensyon.
Gimandoan usab ang DOE ug ang Department of Finance nga magpahigayon og imbentaryo sa kasamtangang mga stock sa LPG ug kerosene sa dili pa magsugod ang pagpatuman sa maong mando.
